ko'ii daaGh hai mere naam par
ko'ii saayaa mere kalaam par
ye pahaaR hai mere saamne
ke kitaab manzar-e-aam par
kisii intizaar-e-nazar meN hai
ko'ii roshnii kisii baam par
ye nagar parindoN kaa Ghol hai
jo giraa hai daana-o-daam par
Gham-e-Khaas par kabhii chup rahe
kabhii ro diye Gham-e-aam par
hai "Munir" hairat mustaqil
maiN khaRaa huuN aise muqaam par
(daaGh : blemish) (manzar-e-aam : in public)
(baam : terrace) (Ghol : nest) (mustaqil : continously; muqaam : situation) |